ನಾನೂ ಅತ್ಯಾಚಾರಿ - ಕವಿತೆ - ದೀಕ್ಷಿತ್ ನಾಯರ್

ನಾನೂ ಅತ್ಯಾಚಾರಿ

ಅತ್ಯಾಚಾರಿ ಎಂದರೆ ಅನಾಮಧೇಯ 

ಜಾಗದಲ್ಲಿ, ಆಕೆಯ ಎದೆಯೊಳಗಿನ ಆರ್ದ್ರತೆಗೆ ಕಿವಿ ಕೊಡದೆ, ವಗರು ವಗರಾಗಿ ಅಂಗಾತ ಮೈ ಮೇಲೆ ಬಿದ್ದು,

ಖೇಚರಕ್ಕೇರಿದ ಅವಳ ದನಿಯ ಲಕ್ಷ್ಯವಿಲ್ಲದೆ,ಉನ್ಮತ್ತ ಬೈರಾಗಿಯಂತೆ ಹೂಂಕರಿಸುತ್ತಾ,

ಬಿಳುಪೇರಿದ ತುಟಿಯ ಕಚ್ಚುತ್ತಾ,

ಮೃಗದ ಲಂಪಟತನ ಬೀರಿ,ಜಿಗುಟುತ್ತಾ ಕೆಂಪು ರಂಗನ್ನು ನೆಲಕ್ಕೆ ಕೆಡವುವವನಂತೆ ಹೌದಾ?

ನೀರಸವೆನಿಸಿದ ರಾತ್ರಿಗಳಲ್ಲಿ

ಬಿನಾಕಾ ಹಲ್ಲ ತೆರೆಯುತ್ತಾ,

ಗೆಳೆಯರೊಂದಿಗೆ ಹರಟುತ್ತಾ,

ಆಗುಂತಕಿ ಸ್ಪುರದ್ರೂಪಿ ಹೆಣ್ಣ

ನೆನೆಯುತ್ತಾ;

ಆಕೆಯ ಉಬ್ಬಿದ ಎದೆ,ಗದಗುಡವ ನಿತಂಬಗಳಿಗೆ

ರೂಪಕ ನೀಡಿ ಮನದೊಳಗೆ

ಆಕೆಯ ನಗ್ನ ದೇಹ ಸೃಷ್ಟಿಸಿ ಇಷ್ಟ ಬಂದಂತೆ ಆಕ್ರಮಿಸುತ್ತೀನಲ್ಲ?

ಹೌದು ನಾನೂ ಅತ್ಯಾಚಾರಿ

ಹೋದಲ್ಲಿ ನಿಂತಲ್ಲಿ ಹೊಕ್ಕುಳ

ಮೇಲಕ್ಕೆ ಪ್ರವಹಿಸುವ ಕಾಮವ

ಅತ್ತಿತ್ತ ಸುಳಿದಾಡುವ ಹೆಣ್ಣ ಮೇಲೆ ಹೇರಿ

ಆಕೆಯನ್ನು ಸ್ಪರ್ಶಿಸದೆ ಕಲ್ಪನೆಯಲ್ಲಿಯೇ ಹಿಂಡಿ ಹಾಕಿ

ನನ್ನ ತೃಷೆ ತೀರಿಸಿಕೊಂಡು ತೃಪ್ತ

ಭಾವದೊಂದಿಗೆ ನಗುತ್ತೀನಲ್ಲ?

ಹೌದು ನಾನೂ ಅತ್ಯಾಚಾರಿ

ಅತ್ಯಾಚಾರವೆಂದರೆ ದೈಹಿಕವಾಗಿ

ತಾಕುವುದೇನಲ್ಲ;

ವಾಂಛೆಯ ಬೀಭತ್ಸತೆಗೆ ಸಿಲುಕಿ

ಗಾವುದ ನಿಂತು ಹೆಣ್ಣೊಬ್ಬಳ

ವ್ಯಕ್ತಿತ್ವವನ್ನೇ ತಲೆ ಕೆಳಗೆ ಮಾಡುವುದಿದೆಯಲ್ಲಾ ಅದೂ ಅತ್ಯಾಚಾರವೇ;

ಮತ್ತೇ ಅವಳದೇ ಗುಂಗಲ್ಲಿ ಅವಳ ಇಡೀ ರೂಪವನ್ನು ಬ್ರಹ್ಮ ರಂಧ್ರಕ್ಕೇರಿಸಿಕೊಂಡು ಭೋಗಿಸುವುದಿದೆಯಲ್ಲಾ? ಅದೂ ಅತ್ಯಾಚಾರವೇ;

ಹೌದು ನಾನೂ ಅತ್ಯಾಚಾರಿ

ಈಗ ನಾನು ಬದಲಾಗ ಬೇಕಿದೆ

ಜಗತ್ತು ತನ್ನಿಂತಾನೆ ಬದಲಾಗುತ್ತದೆ

                           ದೀಕ್ಷಿತ್ ನಾಯರ್

         ಯುವ ಬರಹಗಾರ, ವಾಗ್ಮಿ ಮತ್ತು ನಿರೂಪಕ