ಆಕೆಗೆ ಅದು ಮೊದಲ ರಾತ್ರಿಯಲ್ಲ! - ಕವಿತೆ - ಅನಂತ ಕುಣಿಗಲ್

" ಆಕೆಗೆ ಅದು ಮೊದಲ ರಾತ್ರಿಯಲ್ಲ! "

ಆಕೆಗೆ ಅದು ಮೊದಲ ರಾತ್ರಿಯಲ್ಲ

ಯಾಕೆಂದರೆ, ಅವಳು ಮದುವೆಯೇ ಆಗಿರಲಿಲ್ಲ!!

ಇಪ್ಪತ್ತೆರೆಡು ವರ್ಷದ ಆ ಬಾಲಕಿ

ಹೆಚ್ಚು ಓದಲಾಗಲಿಲ್ಲ, ಕಾರಣ ನೂರಾರು 

ಅಪ್ಪ ಕುಡಿದು ಕುಡಿದು ಸತ್ತ

ಇಲ್ಲ, ಮಗನಿಂದಲೇ ಕೊಲೆಯಾದ

ಅಪರಾಧಿ ತಮ್ಮ ಜೈಲಿಗೆ ಹೋದ

ಅಮ್ಮ ಒಬ್ಬಳೇ ಹಾಸಿಗೆ ಮೇಲೆ ದಿನ ಎಣಿಸುತ್ತಿದ್ದಾಳೆ

ಹಾಳಾದ ಕ್ಯಾನ್ಸರ್ ರೋಗ

ಆರು ವರ್ಷಗಳಿಂದ ಅವಳ ನಗು ಕಿತ್ತುಕೊಂಡಿದೆ 

ಈಗಲೂ ಅವಳು ಸ್ವಾರ್ಥಿಯಾದರೆ..?

ಆ ಬದುಕಿಗೆ ಅರ್ಥವುಂಟೆ?!

ಓದಿಗೆ ತಕ್ಕನಾದ ಕೆಲಸವಿಲ್ಲ

ತನ್ನವರು ಅಂತ ಯಾರೂ ಇಲ್ಲ

ಒಬ್ಬಳಿಗೊಬ್ಬಳೇ.. ಒನಕೆ ಓಬವ್ವನೂ ಅಲ್ಲ 

ಮದುವೆಯಾದರೆ ಸರಿಯಾಗುವುದೇ ಎಲ್ಲ?

ನಂತರವೂ ಎಲ್ಲ ಹೀಗೆ ಇದ್ದರೆ.. ಮದುವೆ ಅನರ್ಥ

ಹೀಗೇ ಇದ್ದುಬಿಡೋಣ.. ಅದೊಂದು ಗಟ್ಟಿ ನಿರ್ಧಾರ 

ಎಷ್ಟು ದುಡಿಯಬಹುದು?

ಎರಡೇ ಎರಡು ಕೈಗಳು?!

ಪಾಪ ಪುಟ್ಟ ಕೈಗಳು

ಸೂರ್ಯನಿಗೂ ಸಮಯದ ಅರಿವಿಲ್ಲ

ಬೇಗ ಬಂದು ಬೇಗ ಹೋಗುತ್ತಾನೆ

ಸಿಗುವುದು ಚಿಲ್ಲರೆ ರೂಪಾಯಿಗಳಷ್ಟೇ

ಅದರಿಂದ ಅವಳ ಹೊಟ್ಟೆ ತುಂಬೀತೇ??

ಹೆತ್ತಾಕೆಯ ರೋಗ ಹೋದೀತೇ??

ಮತ್ತೆ ಎಲ್ಲವೂ.. ಹಾಗೇ!! 

ಇನ್ನೊಂದು ನಿರ್ಧಾರವಾಗಬೇಕಿದೆ

ಹಳ್ಳಿ ಬಿಟ್ಟು ಪಟ್ಟಣ ಸೇರುವುದು

ಅದೂ ಆಯ್ತು..

ಕೆಲಸಕ್ಕಾಗಿ ಅಲೆದಲೆದು ಸಾಕಾಯ್ತು

ಕಣ್ಣಿನಲ್ಲಡಗಿರುವ ನೋವು ನೋಡಿದವರಿಗಿಂತ

ಅವಳೆದೆಯ ಉಬ್ಬು ಸವಿದವರೇ ಹೆಚ್ಚು

ಅವರ ಕಣ್ಣಿನ ದಾಹಕ್ಕೆ ಎದೆಯೇ ಹಿಂಗುತ್ತಿವೆ

ದಿನವೂ ಶೃಂಗಾರ ಮಾಡಲಿಕ್ಕೆ ಹಣ ಬೇಕಲ್ಲ!! 

ಗೊತ್ತಾಯಿತು! ಅವಳಿಗೆ

ತನ್ನ ಕೆಲಸಕ್ಕಿಂತ ಅವರಿಗೆ ತಾನೇ ಹೆಚ್ಚೆಂದು

ಅಲ್ಲ, ತನ್ನ ದೇಹವೇ ಹೆಚ್ಚು!!

ಅದರಲ್ಲೂ ಆ ಎದೆ, ಸೊಂಟ ಮತ್ತು ಅದು!

ಛೇ..!

ಮುಂಗುರುಳು, ಮೂಗುತಿ, ಜಡೆ ನೋಡಿ

ಪ್ರೀತಿ ಮಾಡುವವರು ಇಲ್ಲಿ ಇಲ್ಲವೇ ಇಲ್ಲ!!

ಪ್ರೀತಿ ಕೂಡ ಅನಾಥ 

ಮತ್ತೊಂದು ದೃಢ ನಿರ್ಧಾರ

ಮಂಚಕ್ಕೂ ದುಡಿಮೆಯ ರುಚಿ ತೋರಿಸುವುದು

ಕಾಲುಗಳನ್ನು ಮತ್ತಷ್ಟು ಗಟ್ಟಿಯಾಗುವಂತೆ

ದಿನವೂ ಪೆವಿಕಾಲ್ ಹಚ್ಚುವುದು

ರೂಮು ಯಾವಾಗಲೂ ಘಮ್ಮೆನ್ನುವಂತೆ

ಮಲ್ಲಿಗೆ ಸಂಪಿಗೆ ಮುಡಿಯುವುದು

ಬೆಳಕನ್ನು ಸೀಳುವ ಕತ್ತಲೆಯನ್ನು ಆಹ್ವಾನಿಸಿ

ಶೃಂಗಾರಭರಿತ ನಗುವನ್ನು ರಾತ್ರಿ ಇಡೀ ನುಂಗಿಕೊಳ್ಳುವುದು 

ಬಂಧಿಯಾದ ದೇಹವನ್ನು ಕಾಪಾಡಿಕೊಳ್ಳಲಾಗದ

ಅಸಹಾಯಕ ಕೈಗಳಲ್ಲಿನ ರೋಷವನ್ನು

ಸಮ್ಮನೆ ಹರಿಯಬಿಡುವುದು

ಬಂದವನು ಯಾರೋ..

ಹಣದ ವಾಸನೆ ಮಾತ್ರ ಒಂದೇ..

ಮೊದಲ ರಾತ್ರಿಯ ಉತ್ಸಾಹವಿಲ್ಲದಿದ್ದರೂ

ಹಾಸಿಗೆ ಮಾತ್ರ ಹಸಿಹಸಿಯಾಗಿತ್ತು

ಅವನು ಬಹಳ ಆತುರದಲ್ಲಿದ್ದ

ನಿರೀಕ್ಷೆಯಂತೆ ಏನೂ ಆಗಲಿಲ್ಲ

ನೋವು ಮಾತ್ರ ನಿರಂತರ 

ಅದುವರೆಗೂ ಅನುಭವಿಸದ ನೋವು ಅದು

ನವೋಲ್ಲಾಸದಿಂದ ಸವಿಯಬೇಕಾಗಿದ್ದ ಆ ನೋವು

ಅವಳ ಪಾಲಿಗೆ ಬೇಗ ಒಲಿದಿತ್ತು

ಮೊದಲ ರಾತ್ರಿ ಎಂಬ ಸಂತೋಷ ಅಲ್ಲೇ ಮುಗಿದಿತ್ತು

ಕಳೆದು ಪಡೆದುಕೊಳ್ಳುವ ಆಸೆಯೂ ಬತ್ತಿತ್ತು 

ಮಾರಿಕೊಂಡದ್ದು ಏನನ್ನಾ??

ದೇಹ? ನಗು? ಶೃಂಗಾರ? ನೋವು? ಪ್ರಾಮಾಣಿಕತೆ?

ಬಹುಶಃ ಅವನನ್ನೇ ಹುಡುಕಿ ಮದುವೆಯಾದರೆ..

ಆ ರಾತ್ರಿ ಅವಳಿಗೆ ಮೊದಲ ರಾತ್ರಿಯೇ ಆಗಬಹುದು! 

- ಅನಂತ ಕುಣಿಗಲ್