ಅವಳು ಬಂದಿದ್ದಾಳೆ - ಕವಿತೆ - ದೀಕ್ಷಿತ್ ನಾಯರ್

ಅವಳು ಬಂದಿದ್ದಾಳೆ..!

ಅವಳಿಗೋ ನನ್ನೆಡೆಗೆ ತುಸುವೂ

ಅಕ್ಕಸವಿಲ್ಲ; 

ತಿಂಗಳಾಗುವುದೇ ತಡ ಬಗೆ ಬಗೆಯ ಠರಾವುಗಳೊಂದಿಗೆ ಲಗ್ಗೆ ಹಾಕಿ ಬಿಡುತ್ತಾಳೆ;

ಜೊತೆಯಲ್ಲಿ ಸಾವಿನ ಪ್ರಲಾಪದ ಬೆರಗಿನಂತಹ ವಿಪರೀತ ಬೇನೆಯನ್ನೂ ತಂದಿರುತ್ತಾಳೆ

ಅವಳೋ ಜನ ಜಾಗಗಳಿಗೆ ಹೆದರುವವಳಲ್ಲ

ಬುಳ ಬುಳನೆ ಹರಿದು ಬಿಡುತ್ತಾಳೆ ಎವೆಯಿಕ್ಕದೆ ಕಾಲಿನ ಸಂಧಿಗಳಲ್ಲಿ;

ಒಳ ಉಡುಪಿನ ಆಕಾರವೇ ಬದಲಾಗಿ ಹೋಗಬೇಕು ಅಷ್ಟು ಒದ್ದೆ ಮಾಡುತ್ತಾಳೆ;

ನೀಲಿ,ಕಪ್ಪು,ಹಳದಿ ಏನೇ ಇರಲಿ ಅವಳ ಹಾವಳಿಗೆ ಅದು ಸಂಪೂರ್ಣವಾಗಿ ಕೆಂಪಗಾಗಿರುತ್ತದೆ

ಅಬ್ಬಾ! ಅವಳು ಏಳು ದಿನವಾದರೂ ಸುಮ್ಮನಾಗದ ಮಹಾಕಾಳಿ;

ಇಟ್ಟ ಕಣ್ಣೀರ ಹನಿಗಳೆಲ್ಲವೂ ವರ್ಜ್ಯ ಅವಳ ಮುಂದೆ

ಒಂದೇ ಸಮನೆ ಮೊರೆಯುತ್ತಾಳೆ ಘಂಟೆಯಂತೆ;

ಕ್ಷಣ ಕ್ಷಣವೂ ಹಾಸಿಗೆಯ ಮಗ್ಗಲು ಬದಲಿಸುವಂತೆ ಮಾಡುತ್ತಾಳೆ

ನಾಭಿಯಾಳದಲ್ಲಿ ಚಳುಕುಗಳೊಂದಿಗೆ ಗಿರಕಿಯೂ ಹೊಡೆಯುತ್ತಾಳೆ;

ಛೀ.. ಬಿಡಿ ಅವಳು ನನ್ನಂಥಲ್ಲವಲ್ಲ? ಅದಕ್ಕೆ ನನ್ನೆಡೆಗೆ ಒಲವಿಲ್ಲ

ಮೂಗಿನ ಹೊಳ್ಳೆಗಳೆರಡನ್ನು ಹೊಲಿದು ಹಾಕಿದರೂ ವ್ಯರ್ಥವೇ ಅಷ್ಟು ನಾರುತ್ತಾಳೆ;

ನನ್ನಲ್ಲಿಯೇ ಹೇವರಿಕೆ ಹುಟ್ಟಬೇಕು ಹಾಗೆ ಮಾಡುತ್ತಾಳೆ

ಕೆಲವೊಮ್ಮೆಯಂತೂ ನನ್ನ ಮರ್ಯಾದೆಗೆ ತಿಲಾಂಜಲಿ ಬಿಡುತ್ತಾಳೆ;

ತರ್ಕ ಹೀನ ಜಗತ್ತಿನಲ್ಲಿ ತಲೆ ತಗ್ಗಿಸುವಂತೆ ಮಾಡುತ್ತಾಳೆ

ಮೈಯ್ಯ ಸತುವನ್ನೆಲ್ಲಾ ನಿಷ್ಕ್ರಿಯಗೊಳಿಸಿ,ನನ್ನ ನಾಲಿಗೆಯನ್ನೂ ಅಟ್ಟೆಯಾಗಿಸಿ ಗಹಗಹಿಸಿ ನಗುತ್ತಾಳೆ

ಅವಳ ಘೀಳಾಟಗಳನ್ನು ಸೈರಿಸದ ನಾನೋ ಹೇಳಿಯೇ ಬಿಡುತ್ತೇನೆ " ಹೋಗು ದೂರ ಇನ್ನೆಷ್ಟು ದಿನ ಹೀಗೆ ಸಾಯಲಿ?" ಎಂದು;

ಅವಳೂ ಪಾಪ ನಿರುಮ್ಮಳವಾಗಿಯೇ ಉತ್ತರಿಸುತ್ತಾಳೆ

"ಅಯ್ಯೋ! ಹೆಣ್ಣೆ, ನಾನಿದ್ದರಲ್ಲವೇ ನಿನಗೆ ಹೆಣ್ತನ ಮತ್ತು ತಾಯ್ತನ; ನಾನಿದ್ದರಲ್ಲವೇ ಕಚ್ಚೆ ಹರುಕರು ತಹ ತಹಿಸಿ ನಿನ್ನಡೆಗೆ ಸುಳಿಯುವುದು

ಕೇಳಿಲ್ಲಿ ನಾನಿಲ್ಲದಿದ್ದರೆ ನಿನ್ನ ನಸೀಬು ಖೊಟ್ಟಿಯಾಗುತ್ತಿತ್ತು;

ಮತ್ತೂ ಹೇಳುವೆ ಕೇಳು ನಾನಿಲ್ಲದಿದ್ದರೆ ನೀನು ಹೆಣದ ಮೇಲಿನ ಹೂವು!" 

ಆಗ ನಾನು ದೊರಗು ದನಿಯಲ್ಲಿಯೇ " ಆಯ್ತು ಬಾ ಮಾರಾಯ್ತಿ ನಿನಗೆ ಹೃದಯ ತುಂಬಿದ ಸ್ವಾಗತ" ಎಂದು ನಿಚ್ಚಳವಾಗಿ ಹೇಳಿ ಬಿಡುತ್ತೇನೆ

ಆದರೂ ಅವಳು ಬಂದಾಗ ನಾನು ನಾನಾಗಿ ಇರುವುದೇ ಇಲ್ಲ;

ಪಾಪಿಗೇಡಿ ಅವಳು ಈ ಬಾರಿ ಒಂದು ವಾರದ ಮುಂಚೆಯೇ ಬಂದಿದ್ದಾಳೆ!..

ದೀಕ್ಷಿತ್ ನಾಯರ್

ಯುವ ವಾಗ್ಮಿ, ಯುವ ಬರಹಗಾರ & ನಿರೂಪಕ

ಮಂಡ್ಯ