ಗಂಗೆಯ ಮಡಿಲಲ್ಲಿ - ತಿರಸ್ಕರಿಸಲ್ಪಟ್ಟ ಕವಿತೆ - ಅನಂತ ಕುಣಿಗಲ್

     ಈ ಕವಿತೆಯಲ್ಲಿ ಅವರಿಗೆ ಕಂಡಂತಹ ತಪ್ಪು ಏನು ಎಂದು ನಿಜಕ್ಕೂ ತಿಳಿಯುತ್ತಿಲ್ಲ. ನಮ್ಮಂಥ ಬರಹಗಾರರಿಂದ ಬೇಕಾದಷ್ಟು ಬರೆಸಿಕೊಂಡು ಘನತೆ ಹೆಚ್ಚಿಸಿಕೊಳ್ಳುವ ಕೆಲವು ಪತ್ರಿಕೆ, ಬ್ಲಾಗ್ ಗಳು, ಇ-ಪತ್ರಿಕೆಗಳಿಗೆ ನಿಜಾಂಶಗಳಿರುವ ಬರಹಗಳನ್ನು ಕಂಡರೆ ನಿರಾಕರಿಸುವುದೇಕೆ?? ಇದರಿಂದ ಅವರು ಸಮಾಜಕ್ಕೆ ಸಾರುವುದಾದರೂ ಏನು???
ಬೆತ್ತಲೆ ಬರಹಗಳನ್ನು ಚಪ್ಪರಿಕೊಂಡು ಓದುವಂತೆ ಚಿತ್ರಗಳ ಚಿತ್ತಾರದೊಂದಿಗೆ ಪ್ರಕಟಿಸುವ ಇಂತಹ ಹತ್ತಾರು ದಿನಪತ್ರಿಕೆಗಳಿಗೆ, ಇ- ಪತ್ರಿಕೆಗಳಿಗೆ ಹಾಗೂ ಬ್ಲಾಗ್ ಗಳಿಗೆ ನಾಚಿಕೆಯಾಗಬೇಕು.
ಕನಿಷ್ಠ ಕಾರಣವನ್ನಾದರೂ ಕೊಟ್ಟಿದ್ದರೆ ಕಳೆದುಕೊಳ್ಳುತ್ತಿದ್ದ ಗಂಟು ಏನು ಎಂಬುದೇ ನನ್ನ ಮುಂದಿರುವ ಪ್ರಶ್ನೆ.

ಕವಿತೆಯಲ್ಲಿ ಅಂದಿನ ಗಂಗೆಗೂ ಇಂದಿನ ಗಂಗೆಗೂ ಹೋಲಿಕೆ ಮಾಡಿ, ದುರಂತಗಳಿಗೆ ಕಾರಣವಾದ ಪರಿಸರವನ್ನು ಹಾನಿ ಮಾಡಬಹುದಾದ ನಮ್ಮ ಕೆಲವು ಹಾಳು ಚಟುವಟಿಕೆಗಳ ಬಗ್ಗೆ ನಮ್ಮನ್ನೇ ಪ್ರಶ್ನಿಸಿಕೊಳ್ಳುವ ಹಾಗೂ ದೂಷಿಸಿಕೊಳ್ಳುವ ಸಾಲುಗಳಿವೆ. ಅದರಲ್ಲಿ ಕಾಣುವ ತಪ್ಪೇನು ಅಂತ ನನಗೆ ತಿಳಿದಿಲ್ಲ. ಓದಿದಾಗ ನಿಮಗೆ ತಿಳಿದರೆ, ದಯವಿಟ್ಟು ತಿಳಿಸಿ.

(ಗಂಗಾಮಾತೆ ಕಲುಷಿತಗೊಳ್ಳಲು ಇವರ ಕೊಡುಗೆ ಏನೂ ಇಲ್ಲ ಅಂತ ಕಾಣ್ತದೆ. ಬಹುಶಃ ಇವರು ಭಾರತದಲ್ಲಿಲ್ಲ!)

"ಗಂಗೆಯ ಮಡಿಲಲ್ಲಿ"

ಭಾರತದ ಜಲ ಇತಿಹಾಸವನ್ನೇ
ಬರೆದ ಮಾತೆ; ಗಂಗಾ
ಅದೆಷ್ಟು ಸ್ವಚ್ಚಂದ!
ಅದೆಂತಾ ಸೊಬಗು!!
ಅದೆಲ್ಲಾ ಈಗ ಮಾಯವಾಗಿದೆ!

ಪ್ರಾಚೀನ ಹಾಗೂ ಪಾವಿತ್ರ್ಯತೆಯ
ಪುರಾಣ ಮಹಾಕಾವ್ಯಗಳ ದೇವನದಿ
ಗಂಗೋತ್ರಿ ತಪ್ಪಲಿನ ಹಿಮನದಿ

ಅಖಂಡ ಭಾರತದ ಜೀವನದಿ
ಎಲ್ಲರಿಂದ ಪೂಜಿತ ಮಾತೆ;
ಅದುವೇ ನಮ್ಮ ಗಂಗಾ ಮಾತೆ

ಗೂಲ್ಲರು, ಕಾಕರು, ಪಾದಚಾರಿಗಳು
ದೂರದಿಂದ ದಣಿದು ಬಂದ
ವಿಧವಿಧ ವಿದೇಶದ ಜನರೂ..
ಇಲ್ಲೇ ಹುಟ್ಟಿ, ಇಲ್ಲೇ ಬೆಳೆದ
ಬಡಬಗ್ಗ ಹಿರಿಯರೂ ಕುಡಿದು ಜೀವಿಸಿದ
ಅಮೃತ ಪಾನಕ; ಗಂಗಾ

ಪ್ಲಾಸ್ಟಿಕ್ ಮುಕ್ತ ತಿಳಿ ನೀರು
ಜೀವಜಲದ ಸಿಹಿ ನೀರು
ಪಾಚಿ-ಪ್ರಾಣಿಗಳಿಗಾಧಾರ
ದೇವರ ಹುಟ್ಟು, ನಮ್ಮಯ ಅಂತ್ಯದ
ಸೂತಕದ ಸುಳಿಯೇ ಈ ನೀರು
ಈಗ ಎಲ್ಲವೂ ಇಲ್ಲೇ; ಸಾವೂ ಕೂಡ

ಈಜಿದವರು, ಪೂಜಿದವರು
ಕುಡಿದವರು, ಮೂತ್ರ ಮಾಡಿದವರು
ವಿಷವ ಸುರಿದವರು, ಬಾಟಲಿ ಮಾರಿದವರು
ಶ್ರೀಮಂತರು, ನೀರು ಸಿಗದೆ ಬಡವರಾದವರು
ಎಲ್ಲಾ ಧರ್ಮದ ಎಲ್ಲಾ ಜಾತಿಯ
ಎಲ್ಲರೂ ಇಲ್ಲೆ ಇದ್ದಾರೆ ನೋಡಿ
ಇಲ್ಲಾ, ತೇಲುತ್ತಿದ್ದಾರೆ ನೋಡಿ
ಈ ಬತ್ತದ ಅಗಣಿತ ವಿಶಾಲ ಹೃದಯದಲ್ಲಿ
ಸೋತು ಮಲಗಿವೆ ನೋಡಿ ಸಾಲು ಹೆಣಗಳು
ಗಂಗೆಯ ಮಡಿಲಲ್ಲಿ..

ಗಂಧದಕಡ್ಡಿಯ ಹೊಗೆಯೊಟ್ಟಿಗೆ
ಕರ್ಪೂರವೂ ಜ್ವಲಿಸುತ್ತಿದೆ
ಗಂಟೆ-ಜಾಗಟೆಗಳೊಟ್ಟಿಗೆ
ತಮಟೆ-ತಟ್ಟೆಗಳೂ ಮಾರ್ಧನಿಸುತ್ತಿವೆ
ಸತ್ತವರ ನೆರಳಿನ ಕೂಗು ಮೊಳಗುತ್ತಿದೆ
ಸತ್ತು ತೇಲುವವರ ಸಂಖ್ಯೆ ಮುಗಿಲು ಮುಟ್ಟಿದೆ
ಅದೇ ಗಂಗೆಯಲ್ಲಿ..
ಶುದ್ಧವಿಲ್ಲದ ಪರಿಶುದ್ಧ ಗಂಗೆಯಲ್ಲಿ..



                         - ಅನಂತ ಕುಣಿಗಲ್

            ananthangowda97@gmail.com