ವಿಷಯಕ್ಕೆ ಹೋಗಿ

ಸೈಕಲ್ ನೆನಪು - ಕವಿತೆ - ಅನಂತ ಕುಣಿಗಲ್


ಸೈಕಲ್ ನೆನಪು

ಈಗಲೂ ಅಲ್ಲೇ ನಿಂತಿದೆ
ಇನ್ನೇನು ಬೀಳಲಿರುವ ಹಳೇ ಬಿಳಿ ಗೋಡೆಗೆ
ಬೋರಲಾಗಿ ವರಗಿಕೊಂಡು;
ನನ್ನ ನೆಚ್ಚಿನ ಸೈಕಲ್
ಹದಿಮೂರು ವರ್ಷಗಳಾಯ್ತು
ಅಪ್ಪ ಹೋಗಿ,
ಆದರೂ ಅಪ್ಪ ಸನಿಹವೇ ಇರುವಂತೆ ನೆಪ್ಪಾಗ್ತಾರೆ
ಆ ಸೈಕಲ್ ನೋಡಿದಾಗ

ಮಂಡಿ ಆಪರೇಷನ್ ಮಾಡಿಸಿಕೊಂಡು
ಮಲಗುವುದೊಂದೇ ಬಾಕಿ;
ಹರಸಾಹಸಪಟ್ಟು ಸೈಕಲ್ ಕಲಿಯಲು ಹೋದಾಗ
ಅಪ್ಪಾ.. ಅವ್ವಾ.. ಅಣ್ಣಾ.. ಎಲ್ಲರೂ ಸಹಕರಿಸಿದ್ದಾರೆ
ಎಷ್ಟೋ ಸಲ ಬಿದ್ದು, ಎದ್ದು, ಮತ್ತೆ ಬಿದ್ದು..
ಅದೊಂದು ರಾಮಾಯಣವೇ ಸರಿ
ಕಲಿತದ್ದೇ ಒಂದು ಸೋಜಿಗ!
ಯಾವಾಗ ನೆನೆದರೂ ಮೈ ಪುಳಕಿತ

ಅಟ್ಲಾಸ್, ಹರ್ಕ್ಯುಲಸ್
ಇವೆರಡೇ ಕಂಪನಿಗಳು ಗೊತ್ತಿದ್ದು
ವಜ್ರಮುನಿ ಮಾಡುತ್ತಿದ್ದ ಪಾತ್ರಗಳ ಹೆಸರನ್ನೇ
ನಮ್ಮ ಸೈಕಲ್ಲುಗಳಿಗೆ ನಾಮಕರಣ ಮಾಡುತ್ತಿದ್ದೆವು
ಚಕ್ರ ತಿರುಗಿದ ವೇಗಕ್ಕೆ ಬ್ಯಾಟರಿ ಚಾರ್ಜ್ ಆಗಿ
ಮುಂದಿನ ಹೆಡ್ ಲೈಟ್ ಹತ್ತುತ್ತಿದ್ದವು
ಆ ಚಕ್ರಗಳಿಗಂತು ಉಸಿರುಕಟ್ಟುವ ಹಾಗೆ
ಬಣ್ಣಬಣ್ಣದ ಮಣಿಗಳಿಂದ ಅಲಂಕರಿಸುತ್ತಿದ್ದವು
ಸೀಟುಗಳಿಗೆ ಚಲನಚಿತ್ರಗಳ ಪೋಸ್ಟರುಗಳು
ಚಿತ್ರ-ವಿಚಿತ್ರವಾಗಿ ಕೂಗುವ ಹಾರನುಗಳು
ಹುಡುಗಿಯರ ಸೈಕಲ್ಲುಗಳಿಗೆ ಮುಂದೆ ಬುಟ್ಟಿ ಇದ್ದವು
ಅವೆಲ್ಲವೂ ಸೈಕಲ್ಲುಗಳನ್ನು ಜೀವಂತವಾಗಿರಿಸಿದ್ದವು

ಆಯುಧ ಪೂಜೆಯ ದಿನವಂತೂ ದೊಡ್ಡ ಹಬ್ಬ
ಲಗ್ಗೇಜ್ ಮೇಲೆ ಲಗ್ಗೇಜ್ ಹೊತ್ತು
ಸುಸ್ತಾಗಿದ್ದ ಗುಜುರಿ ಸೇರಬೇಕಿದ್ದ ಸೈಕಲ್ಲನ್ನು
ಹೊರತೆಗೆದು, ಕೆರೆಯಲ್ಲಿ ಸ್ನಾನ
ದೃಷ್ಠಿಯಾಗಬಾರದೆಂದು ಕಪ್ಪು ದಾರ
ವಿಭೂತಿ ಜೊತೆಗೆ ಥರಥರಹದ ಬಣ್ಣಗಳಿಂದ
ಸೈಕಲ್ಲಿನ ಮೈಯನ್ನೇ ಮುಚ್ಚುವಂತೆ ಬಳಿದು
ಚಿತ್ತಾರದ ತೋರಣಗಳನ್ನು ಕಟ್ಟುತ್ತಿದ್ದೆವು
ನೈವೇದ್ಯಕ್ಕಾಗಿ ಕಡ್ಲೆಪುರಿ ಪ್ರಸಾದ ಬೇರೆ
ನಂತರ ಊರೆಲ್ಲ ಮೆರವಣಿಗೆ; ಅಂದೂ ಕೂಡ ಬಿಡುವಿಲ್ಲ

ಹೆಚ್ಚು ಕಮ್ಮಿ ಊರಿನ ಹೈಕ್ಳೆಲ್ಲಾ ಸವಾರಿ ಮಾಡಿದ್ದಾರೆ
ಒಂಟೆಕೇತ, ಹಾವುರಾಣಿ, ಬೀದಿ ನಾಯಿಗಳ ಶವಗಳನ್ನು
ಊರಾಚೆಗೆ ಹೋಯ್ದು ಸಂಸ್ಕಾರ ಮಾಡಿದ್ದುಂಟು
ಚಿಕ್ಕವರನ್ನು ಶಾಲೆಗೆ ಬಿಡಲು ಮತ್ತು ಕರೆತರಲು
ಚೇಪಿಕಾಯಿ ಕದ್ದು ಕೀಳಲು ಏಣಿಯಾಗಿ
ಮೇವಿನ ಮೂಟೆಗಳನ್ನು ಸಾಗಿಸಲು
ಮೇಷ್ಟ್ರುಗಳನ್ನು ಬಸ್ಟ್ಯಾಂಡಿಗೆ ಡ್ರಾಪ್ ಮಾಡಲು
ಗಣೇಶನ ವಿಸರ್ಜನೆಗೆ ಭರ್ಜರಿ ಬ್ಯಾಂಡು ಸಮೇತ
ಸೈಕಲ್ಲನ್ನೂ ನೀರಿಗೆ ಬಿಟ್ಟು; ಬೆಳಿಗ್ಗೆ ಹುಡುಕಿದ್ದುಂಟು
ಹಾಗೇ,
ಸರ್ಕಾರ ಕೊಟ್ಟ ಸೈಕಲ್ಲುಗಳನ್ನು ಬಳಸದ ಕಾರಗಳೇ ಇಲ್ಲ

ಆರೋಗ್ಯದ ಗುಟ್ಟೆಂದರೆ ಮನೆಗೊಂದು ಸೈಕಲ್
ಎಂದು ನಂಬಿದ್ದ ನಮ್ಮನ್ನು ಮೀರಿ
ಈಗೆಲ್ಲಾ ಸೈಕಲ್ಲುಗಳು ಅಪ್ಡೇಟ್ ಪಡೆದಿವೆ
ಪಂಚರ್ ಆಗದ, ಕಾಲು ನೋವು ಬರದ
ಗುಂಡಿಗೆ ಬಿಟ್ಟರೂ ಕುಲುಕದ
ಐಶಾರಾಮಿ ರೂಪು ಪಡೆದಿವೆ
ಆದರೂ ಆ ಗೋಡೆಗೆ ವರಗೆಕೊಂಡು ನಿಂತಿರುವ
ಹಳೇ ಕಂಪನಿಯ ಸರ್ವಕಾಲಿಕ ಹಾಗೂ,
ಆಲ್ ರೌಂಡರ್ ಸೈಕಲ್ಲುಗಳನ್ನು ಇತ್ತೀಚೆಗೆ ನೋಡಲೇ ಇಲ್ಲ
ಆ ಮಜಾ ದಿನಗಳು ಬರೀ ನೆಪ ಮಾತ್ರ; ಅಪ್ಪನ ಹಾಗೆ
ಕೈತಪ್ಪಿ ಹೋದದ್ದು ಮತ್ತೆ ಸಿಕ್ಕರೂ..
ಮೊದಲಿನ ನಲಿವು ಅವುಗಳಿಂದ ಎಂದಿಗೂ ಸಿಗದು;
ನಮ್ಮ ಬಾಲ್ಯವೂ ಕೂಡ!

                       - ಅನಂತ ಕುಣಿಗಲ್
ಲೇಬಲ್‌ಗಳು:

ಕಾಮೆಂಟ್‌ಗಳು

ಕಾಮೆಂಟ್‌‌ ಪೋಸ್ಟ್‌ ಮಾಡಿ

ಈ ಬ್ಲಾಗ್‌ನ ಜನಪ್ರಿಯ ಪೋಸ್ಟ್‌ಗಳು

ಸಾಹಿತ್ಯ ಸ್ಪರ್ಧೆಗಳು 2023

ವಾರ್ಷಿಕೋತ್ಸವ ಸ್ಪರ್ಧೆಗಳು 2023 ಅವ್ವ ಪುಸ್ತಕಾಲಯ ಸಾಹಿತ್ಯ ಬಳಗದ ವತಿಯಿಂದ ವಾರ್ಷಿಕೋತ್ಸವದ ಪ್ರಯುಕ್ತ ಸಾಹಿತ್ಯ ಸ್ಪರ್ಧೆಗಳನ್ನು ಹಮ್ಮಿಕೊಳ್ಳಲಾಗಿದೆ. ಆಸಕ್ತರೆಲ್ಲರೂ ಭಾಗವಹಿಸಬಹುದು. ಯಾವುದೇ ವಯಸ್ಸಿನ ಮಿತಿ ಇಲ್ಲ. ಯಾವುದೇ ನೊಂದಣಿ ಇರುವುದಿಲ್ಲ. ಸ್ಪರ್ಧೆ 01 - ಪದಬಂದ ರಚನೆ * 4×4 ಮನೆಯ ಪದಬಂಧ ರಚಿಸಬೇಕು. * ಹಾಳೆ ಮೇಲೆ ಬರೆದು ಫೋಟೋ ಕಳಿಸಬಹುದು. * ಕನ್ನಡ ಸಾಹಿತ್ಯ ಪುಸ್ತಕಗಳ ಹೆಸರು, ಲೇಖಕರು, ಪ್ರಶಸ್ತಿಗಳು, ಕೃತಿಯಲ್ಲಿ ಬರುವ ಊರು, ಪಾತ್ರ ಇವುಗಳನ್ನು ಬಳಸಿಕೊಳ್ಳಬಹುದು. ಸ್ಪರ್ಧೆ 02 - ಸ್ವರಚಿತ ಕವನ ಸ್ಪರ್ಧೆ * ಗರಿಷ್ಟ 20 ಸಾಲುಗಳ ಕವನ ರಚಿಸಬೇಕು. * ಯಾವುದೇ ವಿಷಯದ ಮೇಲೆ ಕವಿತೆ ರಚಿಸಬಹುದು. ಸ್ವರಚಿತವಾಗಿರಬೇಕು. ಈ ಹಿಂದೆ ಎಲ್ಲೂ ಪ್ರಕಟವಾಗಿರಬಾರದು. * ಆಯ್ಕೆಯಾದರೆ 2024ರ ಜನೆವರಿಯಲ್ಲಿ ನಡೆಯುವ ಅವ್ವ ಪುಸ್ತಕಾಲಯ ವಾರ್ಷಿಕೋತ್ಸವದ ಕವಿಗೋಷ್ಠಿಯಲ್ಲಿ ಪಾಲ್ಗೊಳ್ಳಬೇಕಾಗುತ್ತದೆ. ಪದಬಂಧ ಹಾಗೂ ಸ್ವರಚಿತ ಕವಿತೆಯನ್ನು ಮೇಲ್ ಮಾಡಲು ಡಿಸೆಂಬರ್ - 31- 2023 ಕೊನೆಯ ದಿನ. ತೀರ್ಪುಗಾರರ ತೀರ್ಮಾನವೇ ಅಂತಿಮ. ಮೇಲ್ : avvapustakaalaya@gmail.com ಪದಬಂಧ ಸ್ಪರ್ಧೆಯಲ್ಲಿ ಅತ್ಯುತ್ತಮವೆನಿಸಿದ ಐವರಿಗೆ & ಸ್ವರಚಿತ ಕವನ ಸ್ಪರ್ಧೆಯಲ್ಲಿ ಆಯ್ಕೆಯಾಗುವ ಹತ್ತು ಜನರಿಗೆ ಪ್ರಶಸ್ತಿಪತ್ರ, ಪುಸ್ತಕ ಬಹುಮಾನ ಹಾಗೂ ನಗದು ಬಹುಮಾನವಿರುತ್ತದೆ.
2 ಕಾಮೆಂಟ್‌ಗಳು
ಇನ್ನಷ್ಟು ಓದಿ

ಓದಬೇಕಾದ ಕನ್ನಡದ ಮಹತ್ತರ ಪುಸ್ತಕಗಳು - ಅವ್ವ ಪುಸ್ತಕಾಲಯ

" ಓದಬೇಕಾದ ಕೆಲವು ಕನ್ನಡ ಸಾಹಿತ್ಯ ಪುಸ್ತಕಗಳು " (ಇದು ನನ್ನ ಸುತ್ತಲಿನವರ ಅಭಿಪ್ರಾಯದ ಮೇರೆಗೆ ಓದುಗರಲ್ಲಿ ಅಭಿರುಚಿ ಹೆಚ್ಚಿಸಲು ಕಟ್ಟಿರುವ ಪಟ್ಟಿ. ನೀವು ಓದಿರುವ ಬೆಸ್ಟ್ ಪುಸ್ತಕಗಳು ಬಿಟ್ಟುಹೋಗಿದ್ದರೆ ದಯವಿಟ್ಟು ಸೇರಿಸಿ) ತೇಜಸ್ವಿ : ಮಹಾಪಲಾಯನ ಕರ್ವಾಲೋ ಪ್ಯಾಪಿಲಾನ್ ಚಿದಂಬರ ರಹಸ್ಯ ಜುಗಾರಿಕ್ರಾಸ್ ಭಯಾನಕ ನರಭಕ್ಷಕ ಕಿರಗೂರಿನ ಗಯ್ಯಾಳಿಗಳು ಅಬಚೂರಿನ ಫೋಸ್ಟಾಫೀಸು ಕೃಷ್ಣೇಗೌಡನ ಆನೆ ಅಣ್ಣನ ನೆನಪು ಹೊಸ ವಿಚಾರಗಳು  ಕೆ ಎನ್ ಗಣೇಶಯ್ಯ : ಶಾಲಭಂಜಿಕೆ ಆರ್ಯವೀರ್ಯ ಗುಡಿಮಲ್ಲಮ್ ಚಿತಾದಂತ ಬೆಳ್ಳಿಕಾಳಬಳ್ಳಿ ಶಿಲಾಕುಲವಲಸೆ ಕನಕಮುಸುಕು  ಕರಿಸಿರಿಯಾನ ಕಪಿಲಿಪಿಸಾರ ಎಸ್ ಎಲ್ ಬಿ : ಭಿತ್ತಿ ವಂಶವೃಕ್ಷ ಗೃಹಭಂಗ ನಾಯಿ ನೆರಳು ಕವಲು ಯಾನ ಸಾರ್ಥ ಪರ್ವ ದಾಟು ಮಂದ್ರ ಆವರಣ  ಅನ್ವೇಷಣ ತ.ರಾ.ಸು : ನಾಗರಹಾವು ಮಸಣದ ಹೂ ಹಂಸಗೀತೆ ಶಿಲ್ಪಶ್ರೀ ರಕ್ತರಾತ್ರಿ ತಿರುಗುಬಾಣ ದುರ್ಗಾಸ್ತಮಾನ  ಗಿರೀಶ್ ಖಾರ್ನಾಡ್ : ಆಡಾಡತ ಆಯುಷ್ಯ ತುಘಲಕ್ ತಲೆದಂಡ ಹಯವದನ ನಾಗಮಂಡಲ ಯಯಾತಿ  ವಸುದೇಂಧ್ರ : ಮೋಹನಸ್ವಾಮಿ ಹಂಪಿ ಎಕ್ಸ್ ಪ್ರೆಸ್ ತೇಜೋ ತುಂಗಭದ್ರ ನಮ್ಮಮ್ಮ ಅಂದ್ರೆ ನಂಗಿಷ್ಟ ಐದು ಪೈಸೆ ವರದಕ್ಷಿಣೆ  ಜೋಗಿ : L ಅಶ್ವತ್ಥಾಮನ್ ಬೆಂಗಳೂರು ಸೀರೀಸ್  ಹಲಗೆ ಬಳಪ ಜಾನಕಿ ಕಾಲಂ ಚಂ. ಶೇ. ಕಂ : ಜೋಕುಮಾರಸ್ವಾಮಿ ಸಂಗ್ಯಾಬಾಳ್ಯ ಸಾಂಬಶಿವ ಪ್ರಹಸನ ಸಿರಿಸಂಪಿಗೆ ಮಹಾಮಾಯಿ ಸಿಂಗಾರೆವ್ವ & ಅರಮನೆ...
3 ಕಾಮೆಂಟ್‌ಗಳು
ಇನ್ನಷ್ಟು ಓದಿ

ಆಕೆಗೆ ಅದು ಮೊದಲ ರಾತ್ರಿಯಲ್ಲ! - ಕವಿತೆ - ಅನಂತ ಕುಣಿಗಲ್

" ಆಕೆಗೆ ಅದು ಮೊದಲ ರಾತ್ರಿಯಲ್ಲ! " ಆಕೆಗೆ ಅದು ಮೊದಲ ರಾತ್ರಿಯಲ್ಲ ಯಾಕೆಂದರೆ, ಅವಳು ಮದುವೆಯೇ ಆಗಿರಲಿಲ್ಲ!! ಇಪ್ಪತ್ತೆರೆಡು ವರ್ಷದ ಆ ಬಾಲಕಿ ಹೆಚ್ಚು ಓದಲಾಗಲಿಲ್ಲ, ಕಾರಣ ನೂರಾರು  ಅಪ್ಪ ಕುಡಿದು ಕುಡಿದು ಸತ್ತ ಇಲ್ಲ, ಮಗನಿಂದಲೇ ಕೊಲೆಯಾದ ಅಪರಾಧಿ ತಮ್ಮ ಜೈಲಿಗೆ ಹೋದ ಅಮ್ಮ ಒಬ್ಬಳೇ ಹಾಸಿಗೆ ಮೇಲೆ ದಿನ ಎಣಿಸುತ್ತಿದ್ದಾಳೆ ಹಾಳಾದ ಕ್ಯಾನ್ಸರ್ ರೋಗ ಆರು ವರ್ಷಗಳಿಂದ ಅವಳ ನಗು ಕಿತ್ತುಕೊಂಡಿದೆ  ಈಗಲೂ ಅವಳು ಸ್ವಾರ್ಥಿಯಾದರೆ..? ಆ ಬದುಕಿಗೆ ಅರ್ಥವುಂಟೆ?! ಓದಿಗೆ ತಕ್ಕನಾದ ಕೆಲಸವಿಲ್ಲ ತನ್ನವರು ಅಂತ ಯಾರೂ ಇಲ್ಲ ಒಬ್ಬಳಿಗೊಬ್ಬಳೇ.. ಒನಕೆ ಓಬವ್ವನೂ ಅಲ್ಲ  ಮದುವೆಯಾದರೆ ಸರಿಯಾಗುವುದೇ ಎಲ್ಲ? ನಂತರವೂ ಎಲ್ಲ ಹೀಗೆ ಇದ್ದರೆ.. ಮದುವೆ ಅನರ್ಥ ಹೀಗೇ ಇದ್ದುಬಿಡೋಣ.. ಅದೊಂದು ಗಟ್ಟಿ ನಿರ್ಧಾರ  ಎಷ್ಟು ದುಡಿಯಬಹುದು? ಎರಡೇ ಎರಡು ಕೈಗಳು?! ಪಾಪ ಪುಟ್ಟ ಕೈಗಳು ಸೂರ್ಯನಿಗೂ ಸಮಯದ ಅರಿವಿಲ್ಲ ಬೇಗ ಬಂದು ಬೇಗ ಹೋಗುತ್ತಾನೆ ಸಿಗುವುದು ಚಿಲ್ಲರೆ ರೂಪಾಯಿಗಳಷ್ಟೇ ಅದರಿಂದ ಅವಳ ಹೊಟ್ಟೆ ತುಂಬೀತೇ?? ಹೆತ್ತಾಕೆಯ ರೋಗ ಹೋದೀತೇ?? ಮತ್ತೆ ಎಲ್ಲವೂ.. ಹಾಗೇ!!  ಇನ್ನೊಂದು ನಿರ್ಧಾರವಾಗಬೇಕಿದೆ ಹಳ್ಳಿ ಬಿಟ್ಟು ಪಟ್ಟಣ ಸೇರುವುದು ಅದೂ ಆಯ್ತು.. ಕೆಲಸಕ್ಕಾಗಿ ಅಲೆದಲೆದು ಸಾಕಾಯ್ತು ಕಣ್ಣಿನಲ್ಲಡಗಿರುವ ನೋವು ನೋಡಿದವರಿಗಿಂತ ಅವಳೆದೆಯ ಉಬ್ಬು ಸವಿದವರೇ ಹೆಚ್ಚು ಅವರ ಕಣ್ಣಿನ ದಾಹಕ್ಕೆ ಎದೆಯೇ ಹಿಂಗುತ್ತಿವೆ ದಿನವೂ ...
14 ಕಾಮೆಂಟ್‌ಗಳು
ಇನ್ನಷ್ಟು ಓದಿ