ಅತ್ಯಾಚಾರ - ಲೇಖನ - ಸ್ವಾತಿ ಶೆಟ್ಟಿ

ಅತ್ಯಾಚಾರ

     ಈ ಪ್ರಪಂಚದಲ್ಲಿ ಅತ್ಯಾಚಾರಕ್ಕೆ ಕೊನೆಯೆ ಇಲ್ಲ ಎಂಬುವುದು ಸ್ಪಷ್ಟವಾಗುತ್ತಿದೆ. ಹೆಣ್ಣೆಂದರೆ ಏನು? ಅವಳು ಅಬಲೇ,ತ್ಯಾಗಮಯಿ,ಮೃದು ಸ್ವಭಾವದ ಮುಗುದೆ.

ಪ್ರತಿ ಹೆಣ್ಣಲ್ಲೂ ಲಕ್ಷ್ಮೀ ನೆಲೆಸಿರುತ್ತಾಳೆ. ಪ್ರತಿ ಹೆಣ್ಣಲ್ಲೂ ಸೀತೆ ವಾಸವಿರುತ್ತಾಳೆ.ಅದಕ್ಕಿಂತ‌ ಮಿಗಿಲಾಗಿ ಪ್ರತಿ ಹೆಣ್ಣಲ್ಲೂ ಒಬ್ಬ ತಾಯಿ, ತಂಗಿ, ಅಕ್ಕ ಇರುತ್ತಾಳೆ.‌ ಹೆಣ್ಣು ಎಂಬುವವಳು ಮಗುವಿಗೆ ತಾಯಿಯಾಗುತ್ತಾಳೆ, ತಮ್ಮನಿಗೆ ಅಕ್ಕನಾಗುತ್ತಾಳೆ, ಅಣ್ಣನಿಗೆ ತಂಗಿಯಾಗುತ್ತಾಳೆ, ಗಂಡನಿಗೆ ಹೆಂಡತಿಯಾಗುತ್ತಾಳೆ. ಹೀಗೆ ಹಲವಾರು ಆಕೆಯ ಬಂಧನದ ಬದುಕು. ಯಾಕೆ ಇಂದು ಈ ಪ್ರಪಂಚದಲ್ಲಿ ಹೆಣ್ಣಿಗೆ‌ ರಕ್ಷಣೆ  ಸಿಗುತ್ತಿಲ್ಲ. ಗಂಡೆಂದರೆ ಹೆಣ್ಣಿಗೆ ರಕ್ಷಣೆ ಕೊಡುವವನು ಎಂಬ ತಪ್ಪು ತಿಳುವಳಿಕೆಯ? 

ಅಂದು ದ್ರೌಪದಿಗೆ ತುಂಬಿದ ಸಭೆಯಲ್ಲಿ  ಅವಮಾನ ಆಗುತ್ತಿದ್ದರೂ, ವಸ್ತ್ರಾಪಹರಣ ಆಗುತ್ತಿದ್ದರೂ‌, ಹೆಣ್ಣಿಗೆ ದೌರ್ಜನ್ಯ ಆಗುತ್ತಿದ್ದರೂ  ಸುಮ್ಮನೆ ಕುಳಿತು ನೋಡುತ್ತಿದ್ದರೇ ವಿನಹ ಅವಳ ಸಹಾಯಕ್ಕೆ ಯಾರು ಒಂದು ಹೆಜ್ಜೆ ಮುಂದಿಡಲಿಲ್ಲ. 

ಎಲ್ಲಾ ಪಾಂಡವರಾಗಲಿ, ಭೀಷ್ಮ, ಗುರು ದ್ರೋಣ, ಎಲ್ಲಾ ಸಭಿಕರು ಮೂಖರಾದಂತೆ, ಕುರುಡ ದೃತರಾಷ್ಟ್ರ ನಂತೆ ಎಲ್ಲರೂ ಕಣ್ಣಿದ್ದು ಕುರುಡರಂತೆ ವರ್ತಿಸಿದ್ದರು. ಅಂದು ಕೃಷ್ಣನ ಸಹಾಯವೂ ಇಲ್ಲದಿದ್ದರೆ‌ ಏನಾಗುತ್ತಿತ್ತೊ‌ ಏನೋ? ‌ಇಂದು‌ ಕೂಡ‌ ಇಂತಹ ಇಷ್ಟು ಮುಂದುವರೆದ ಪ್ರಪಂಚದಲ್ಲೂ ತಿಳುವಳಿಕೆಯ ವಿಶ್ವದಲ್ಲೂ  ಅನ್ಯಾಯ, ಅತ್ಯಾಚಾರ ನಡೆಯುತ್ತಿದ್ದರೂ ಕೂಡ ಜನರು ಮೂಖರಾದಂತೆ, ನ್ಯಾಯದೇವತೆಯ ಹಾಗೇ ಕಣ್ಣಿಗೆ ಬಟ್ಟೆ ಕಟ್ಟಿದಂತೆ ನೋಡುತ್ತಾರೆ‌ ಹೊರತು ಸಹಾಯಕ್ಕಾಗಲಿ, ನ್ಯಾಯಕ್ಕಾಗಲಿ ಹೋರಾಡುವವರಿಲ್ಲ. ಇಂತವರ ನಡುವಲ್ಲಿ ಬೂದಿಯಾಗಿ‌ ಮಸಣ ಸೇರಿದವಳು ಹೆಣ್ಣು. ಇಂತಹ ದುಷ್ಕರ್ಮಿಗಳಿಗೆ ಎಂತಹ ಶಿಕ್ಷೆ ವಿಧಿಸಿದರು ಕಮ್ಮಿಯೆ. ಅವರು ಒಬ್ಬ ತಾಯಿಯ ಹೊಟ್ಟೆಯಲ್ಲಿ ಜನಿಸಿದ್ದರೂ, ಅವರ ಮನೆಯಲ್ಲಿಯೂ ಅಕ್ಕ ತಂಗಿ ಇದ್ದರೂ ಅವರನ್ನು ಕೂಡ ಕಾಮುಕ ದೃಷ್ಟಿಯಿಂದ ನೋಡುವರೋ ಏನೋ?  

ಅತ್ಯಾಚಾರಿಗಳ ಕಾಮುಕ ತನಕ್ಕೆ, ಅತ್ಯಾಚಾರಿಯ ತೆವಲಿಗೆ, ಚಪಲಕ್ಕೆ ಬಲಿಯಾದಳು ಹೆಣ್ಣು, ಭಸ್ಮವಾದಳು‌ ಹೆಣ್ಣು. ಒಂದು ಹೆಣ್ಣಿಗೆ ಅವಮಾನವಾದರೆ ಅದು ಸ್ವತಃ ಗಂಡು ತನಗೆ ತಾನೇ ಮಾಡಿಕೊಳ್ಳುವ ಅವಮಾನ. ಹೆಣ್ಣಿಗೆ ಗೌರವ ಕೊಡದ ಗಂಡು‌ ಹೇಗೆ‌ ಹೆಣ್ಣಿಗೆ ರಕ್ಷಕನಾಗುವ? ಇದೆಲ್ಲಾ ಅರಿವಾಗುವುದು ಯಾವಾಗ? ಇನ್ನು ಕಲಿಯುಗದ ವಿಷ್ಣುವಿನ ಅವತಾರವಾಗಬೇಕೋ ಏನೋ? 

ಅಂದೇ ಇಂತಹ ಅನಾಚಾರದ, ಅತ್ಯಾಚಾರಿಗಳ ಅಂತ್ಯವಾಗುವುದಾ ಏನೋ? ಎಲ್ಲಾ ಹೆಣ್ಣುಮಕ್ಕಳಿಗೆ ಹೇಳುವುದೊಂದೇ ನಿಮ್ಮ ರಕ್ಷಣೆಯಲ್ಲಿ ನೀವಿರಿ.. ಇಲ್ಲಿ ರಕ್ಷಕರಿಲ್ಲ ಭಕ್ಷಕರಿದ್ದಾರೆ. ಸ್ವಯಂ ರಕ್ಷಣೆಗೆ ಮುಂದಾಗಿ.

                           - ಸ್ವಾತಿ ಶೆಟ್ಟಿ