ಆನ್ಲೈನ್ ಬಿಸಿನೆಸ್ಸು - ಕವಿತೆ - ಅನಂತ ಕುಣಿಗಲ್

" ಆನ್ಲೈನ್ ಬಿಸಿನೆಸ್ಸು "

ಈ ಕೊರೋನಾ ಅಲೆಯನ್ನು
ಹೇಗಾದ್ರು ಮಾಡಿ ತಡಿಬೋದು
ಆದ್ರೆ,
ಹತ್ತು ಸಾವಿರ ಹಿಂಬಾಲಕರನ್ನು ಪಡೆದ
ಕೆಲವು ಹೆಣ್ಮಕ್ಳನ್ನು ಮಾತ್ರ ಹಿಡಿಯಲಾಗದು
ಇದ್ಕೆ ಕೆಲವು ಹುಡ್ಗರೂ ಹೊರತಲ್ಲ!!

ಇನ್ಸ್ಟಾ, ಫೇಸ್ಬುಕ್ ಪೇಜ್ ಇನ್ನೂ ಹಲವಾರಿವೆ
ಅವ್ಗಳ ಹೆಸ್ರು ಮಾತ್ರ ಅವ್ರವ್ರಿಗೆ ಗೊತ್ತು
ಮೊದಮೊದಲು ಯಾವ ಗೋಜು ಇರೋದಿಲ್ಲ
ಒಂದಿಬ್ಬರು ಹುಡುಗರು ರೆಕ್ವೆಸ್ಟ್ ಕಳ್ಸಿದ್ರೆ ಸಾಕು
ಅವರನ್ನ ಮೆಚ್ಚಿಸಲು ಒಂದೆರಡು ಸ್ಟೋರಿ
ಮತ್ತೆ ತಲೆಬುಡ ಇಲ್ಲದ ರೀಲುಗಳು
ಎಲ್ಲೆಲ್ಲಿಂದಲೂ ಹಿಂಬಾಲಕರು ಸಿಗ್ತಾರೆ
ತಕ್ಕಮಟ್ಟಿಗೆ ಆಟಗಳೂ ಶುರುವಾಗುತ್ತವೆ

ಹಿಂಬಾಲಕರು ಹೆಚ್ಚಾದಂತೆ
ಹಿಂಬಾಲಿಸುವುದನ್ನು ಕಡಿಮೆ ಮಾಡ್ತಾರೆ
ಲೈಕು ಸಿಗದ ಹಳೇ ಫೋಸ್ಟುಗಳು ಬಿನ್ ಸೇರ್ತವೆ
ಯಾರೋ ಮಾಡಿ ಬಿಸಾಕಿದ ವೀಡಿಯೋಗಳಂತೆಯೇ
ಇವರೂ ಪ್ರಾರಂಭಿಸುತ್ತಾರೆ; ಹೆಸರೇ ಇಲ್ಲದ
ಅರವತ್ನಾಲ್ಕು ಸಾವಿರ ಮುಖಭಾವಗಳೊಂದಿಗೆ
ಅರೆ ಹುಚ್ಚಾಟಗಳು, ಸೈಕೋ ಮ್ಯಾನರಿಸಂ
ಇನ್ನೂ ಎಂತೆಂಥದೋ ಖಾಯಿಲೆಗಳು
ಗುಣಮುಖವಾಗುವುದು ಮಾತ್ರ ಸ್ವಲ್ಪ ಕಷ್ಟ ಸಾಧ್ಯ!

ಅಪ್ಪ ಅಮ್ಮ ಇಟ್ಟ ಹೆಸರು
ಅಪ್ಪ ಅಮ್ಮನೇ ಮರೆಯುವಷ್ಟು ದೊಡ್ಡವರಾಗಿರುತ್ತಾರೆ
ಆಟಿಟ್ಯೂಡ್ ಗರ್ಲ್, ಕ್ರೇಜಿ ಏಂಜಲ್, ಡೆವಿಲ್ ಮಾಸ್ಕ್
ಮಾಮ್ಸ್ ಲವ್, ಡ್ರೀಮ್ ಫಂಗಸ್, ಡ್ಯೂಕ್ ಲವರ್
ಯಪ್ಪಾ... ಒಂದಾ.. ಎರಡಾ??
ಬಯೋದಲ್ಲಿ ಜಾತಿ ಗೀಳಿನ ವೈರಸ್ಸು ಬೇರೆ
ಅಪ್ಪಟ, ಹೆಮ್ಮೆ, ಪಕ್ಕಾ ಕನ್ನಡತಿ ಅಂತ ಬೋಗಸ್
ವಾಲ್ ಅಲ್ಲಿ ಕನ್ನಡ ಪದಗಳೇ ಕಾಣ್ಸೋದಿಲ್ಲ

ಶೇರ್ ಮೇಲೆ ಶೇರು
ಶೇರ್ ಮಾರ್ಕೆಟ್ ಕೂಡ ಇಷ್ಟು ಫಾಸ್ಟ್ ಇಲ್ಲ
ಮುಕ್ಕಿರಿದು ಸಾವಿರ ಹಿಂಬಾಲಕರನ್ನು ಪಡ್ಕೋತಾರೆ
ಹೊರ ಹಾಗೂ ಒಳ ಉಡುಪುಗಳ ವ್ಯತ್ಯಾಸ ಗೊತ್ತಿಲ್ಲದಂತೆ
- ನಟಿಸುತ್ತಾರೆ, ಅವರೇ ಮೆಚ್ಚಿಕೊಳ್ತಾರೆ ಕೂಡ!
ಈ ಹಾಳಾದ ಹುಡುಗರೋ...
ದೇಶಕ್ಕಿಲ್ಲದ ಬೆಂಬಲ ಕೊಡ್ತಾರೆ
ಲೈಕು, ಕಮೆಂಟು, ರೀ-ಕ್ರಿಯೇಟು
ಯಾವ ಆಫ್ಶನ್ ಬಿಡದೆ ಎಲ್ಲವನ್ನೂ ಟ್ರೈಮಾಡ್ತಾರೆ
ಆ ನಡುವೆ ಇಬ್ಬರೂ ತಮ್ಮ ಭವಿಷ್ಯ ಮರೆತಿರುತ್ತಾರೆ

ಹತ್ತು ಸಾವಿರದ ಗಡಿ ದಾಟಿದರೆ ಮುಗಿದೇಹೋಯ್ತು
ಮೆಸೇಜುಗಳಿಗೆ ರೀಪ್ಲೆ ಇಲ್ಲ
ಬೇರೆಯವರ ಫೋಸ್ಟುಗಳು ಕಂಡರೂ ನೋಡುವುದಿಲ್ಲ
ಈ ಮಧ್ಯೆ ಜಾಹಿರಾತುಗಳು ಬೇರೆ ಶುರುವಾಗ್ತವೆ
ಅದರಲ್ಲೂ ಈ ಮಾಟ-ಮಂತ್ರ, ಸತಿ-ಪತಿ, ಜ್ಯೊತಿಷ್ಯಗಳದ್ದೇ ದರ್ಬಾರು
ಡಿಎಂ ಫಾರ್ ಪೇಡ್ ಕೊಲ್ಯಾಬೊರೇಷನ್ ಎಂಬ ಬೋರ್ಡ್
ಕಾಲು ನಿಲ್ಲುವುದಿಲ್ಲ, ತಲೆ ಯೋಚಿಸುವುದಿಲ್ಲ
ಆದರೂ ಇದೊಂದು ಬಿಸಿನೆಸ್ ಎಂಬಂತೆ
ಸೆಲೆಬ್ರಿಟಿ ಫೀಲ್ ಅಲ್ಲೇ ವಸಂತ ಕಳೆಯುತ್ತಾರೆ
ನಂತರ, ನ್ಯಾಯಬೆಲೆಯಂಗಡಿಯ ಅಕ್ಕಿಗಾಗಿಯೋ
ಹಾಲಿನ ಕ್ಯಾನ್ ಹಿಡಿದು ಚೀಟಿಗಾಗಿಯೋ
ಸ್ಕ್ರಬ್ಬರ್ ಹಿಡಿದು ಪಾತ್ರೆಗಳ ಮುಖಮಜ್ಜನಕ್ಕೋ
ಕರೆದಾಗ ಹೋಗಿ ಗಂಡನ ಬೆನ್ನು ಉಜ್ಜಲಿಕ್ಕೋ
ಕುಕ್ಕರ್ ವಿಷಲ್ ಆಫ್ ಮಾಡಲಿಕ್ಕೋ
ಮಕ್ಕಳ ತಲೆ ಕೂದಲು ಬಾಚಲಿಕ್ಕೋ
ಅಪ್ಪ-ಅಮ್ಮನೊಂದಿಗೆ ವೀಡಿಯೋ ಕಾಲಿನಲ್ಲಿ ಅಳೋದಿಕ್ಕೋ..
ತುದಿಗಾಲಲ್ಲಿ ನಿಂತಿರ್ತಾರೆ!!

ಇದು ಕಟು ಸತ್ಯ
ವಾಸ್ತವ ಬದುಕಿನ ಬವಣೆ
ಅರಿತವರು ಅರಿಯುವರು
ಬೇರೆಯವರು ಉರಿಯುವರು
ಅರಿದರೂ, ಉರಿದರೂ.. ಸತ್ಯ ಎಂದಿಗೂ ಸತ್ಯವೇ..

                      - ಅನಂತ ಕುಣಿಗಲ್

            ananthangowda97@gmail.com