ಪುಸ್ತಕ ಮಾಡಿಸುವವರಿಗೆ ಮಾರ್ಗಸೂಚಿ - ಸೋನು ಸೌಮ್ಯ, ಯುವ ಕಾದಂಬರಿಗಾರ್ತಿ

ಪುಸ್ತಕ ಪ್ರಕಟಿಸುವ ಮುನ್ನ ಈ ಅಂಶಗಳನ್ನು ತಿಳಿಯಿರಿ

ನೀವು ಪುಸ್ತಕ ಹೊರತರಬೇಕೆಂದಿದ್ದೀರೆ? ಹಾಗಾದರೆ ಈ ವಿವರಗಳನ್ನು ನೋಡಿ..

ಪುಸ್ತಕವೆಂಬುದು ಕೇವಲ ಕಾಗದಗಳಿಂದ ಕೂಡಿದ್ದಲ್ಲ. ಬದಲಿಗೆ ಪ್ರತಿಯೊಬ್ಬ ಬರಹಗಾರರ ಭಾವನೆಯ ಸಮಾಗಮವೇ ಈ ಪುಸ್ತಕ. ಆ ಪುಸ್ತಕ ಮತ್ತೊಬ್ಬರ ಮಸ್ತಕಕ್ಕೆ ಸೇರಿ ಒಂದೊಳ್ಳೆ ಅನಿಸಿಕೆ, ಅಭಿಪ್ರಾಯ ಬಂದಾಗ ಪ್ರತಿಯೊಬ್ಬ ಬರಹಗಾರನಿಗೂ ಆಗುವ ಸಂತೋಷವಿದೆಯಲ್ಲಾ.. ಅದನ್ನು ಬರಹದಲ್ಲಿ ಹೇಳಿ ವ್ಯಕ್ತ ಪಡಿಸಲಾಗದು. ಹಾಗೆಯೇ ಒಂದು ಪುಸ್ತಕ ಹೊರತರುವುದು ಸುಲಭವೇ ಎಂದು ನೋಡಿದಾಗ ಅದೆಷ್ಟೋ ಬರಹಗಾರರು ಹೇಳುವುದು "ಇಲ್ಲ ರೀ ತುಂಬಾ ಕಷ್ಟ, ಆಗಲ್ಲ.. ಹಾಕಿರೋ ಬಂಡವಾಳವೂ ಕೈಗೆ ಸಿಗಲ್ಲ. ಪುಸ್ತಕ ಮಾರಾಟವೂ ಆಗಲ್ಲ" ಅಂತ. 

ಪುಸ್ತಕ ಮಾರಾಟ ಯಾಕಾಗಲ್ಲ? ಎಂಬುವ ಪ್ರಶ್ನೆಯನ್ನು ಸಧ್ಯಕ್ಕೆ ಪಕ್ಕಕ್ಕಿಟ್ಟು ನಿಮ್ಮ ಹಣ ಯಾಕೆ ವಾಪಸ್ ಬರಲ್ಲ ಎಂದು ನೋಡೋಣ. ಅದಕ್ಕೂ ಮುಂಚೆ ಯಾರ ಬಳಿಯಾದರೂ ನೀವು ಹೋಗಿ ಪುಸ್ತಕ ಮಾಡ್ದೆ ಮಾರಾಟವೇ ಆಗಿಲ್ಲ ಲಾಸ್ ಆಯಿತು ಗುರು ಅಂದ್ರೆ.. "ನೀನು ಆತ್ಮತೃಪ್ತಿಗಾಗಿ ಬರೆದ್ಯ? ಅಥವಾ ಹಣಕ್ಕಾಗಿ ಬರೆದ್ಯ? ನೀನು ಸಾಹಿತ್ಯ ಮಾರಾಟ ಮಾಡ್ತೀಯ? " ಎಂದು ಕೇಳಿ ತರಾಟೆಗೆ ಎಳೆಯುವವರೂ ಇದ್ದಾರೆ ಅಲ್ಲವೇ? 

ಈಗ ನನ್ನ ಸ್ವಂತ ಅನುಭವ ನಿಮಗೆ ಹೇಳ್ತೀನಿ. ಇತ್ತೀಚೆಗಷ್ಟೇ ಅದೂ ಕೊರೋನ ಮೊದಲ ಲಾಕ್ಡೌನ್ ಮುಗಿದು ಜನ ಆಗಷ್ಟೆ ಮೊದಲಿಂದ ಬದುಕು ಕಟ್ಟಿಕೊಳ್ಳಲು ಪರದಾಡುತ್ತಿದ್ದ ಅದೇ ಸಂದರ್ಭದಲ್ಲಿ ಒಂದು ಕಾದಂಬರಿ ನನ್ನದೇ ಸ್ವಂತ ವೆಚ್ಛದಿಂದ ಮುದ್ರಿಸಿದೆ. 228 ಪುಟಗಳ ಕಾದಂಬರಿ ಡಿಟಿಪಿ, ಲೇಔಟ್ ಸೆಟ್ಟಿಂಗ್, ಕವರ್ ಪೇಜ್, ಐಎಸ್‌ಬಿ‌ಎನ್ ಕೋಡ್, ಎಲ್ಲವೂ ಸೇರಿಸಿ 500 ಪ್ರತಿಗಳಿಗೆ ನಾನು ಭರಿಸಿದ ವೆಚ್ಛ 32000₹. ಹೀಗೆ ಪುಸ್ತಕ ಕೈ ತಲುಪಿದ ಒಂದೇ ವಾರದಲ್ಲಿ 150 ಪುಸ್ತಕ ಮಾರಾಟ ಆಯ್ತು. ಕೆಲವೊಬ್ಬರು ಹಣ ಕೊಡ್ತಾರೆ ಕೆಲವೊಬ್ಬರು ಮೋಸ ಮಾಡ್ತಾರೆ. ಹಾಗೆ ಹೀಗೆ ನನಗೆ ಒಂದು ತಿಂಗಳಲ್ಲಿ 27000₹ ಪುಸ್ತಕದ ಹಣ ಬಂತು. ಈಗ 5000₹ ಅಷ್ಟೆ ನನಗೆ ಬೇಕಾಗಿರೋದು ಅಲ್ವೇ ನಾನು ಹೂಡಿದ ಬಂಡವಾಳ ನನ್ನ ಕೈ ಸೇರಲು. ಪುಸ್ತಕವನ್ನು ಸಾರ್ವಜನಿಕ ಗ್ರಂಥಾಲಯ ಸಾಮ್ಯದಡಿ ಕಾಪಿರೈಟ್ ಮಾಡಿಸಿ ಎಸ್.ಸಿ ಪಿ/ಟಿ.ಸಿ.ಪಿ  ಮತ್ತು ಏಕಗವಾಕ್ಷಿ  ಅಡಿ ನೀವು ಪುಸ್ತಕ ಆಯ್ಕೆಗೆ ಅರ್ಜಿ ಹಾಕಬಹುದು. 

ನಾನು ಈ ರೀತಿ ಅರ್ಜಿ ಹಾಕಿ ಈಗ ಎಸ್.ಸಿ.ಪಿ/ಟಿ.ಸಿ.ಪಿ ಅಡಿ ಆಯ್ಕೆ ಆಗಿ ಒಟ್ಅಟು 80 ಪುಸ್ತಕಗಳನ್ನು ಕೊಂಡರು. ರೂ 17,500₹ ಬಂತು. ಅಲ್ಲಿಗೆ ಮಾರಾಟ ಆಗಿ ಬಂದದ್ದು 27000₹ ಮತ್ತು ಸಾರ್ವಜನಿಕ ಲೈಬ್ರರಿ ಇಂದ ಈ ಮೊತ್ತ ಸೇರಿಸಿ ಅಸಲಿನ ಜೊತೆಜೊತೆಗೆ ಸ್ವಲ್ಪ ಲಾಭವೂ ಬಂದಿದೆ. ಈಗ ಹೇಳಿ ನಾವು ಹಾಕಿದ ಬಂಡವಾಳ ನಮಗೆ ವಾಪಸ್ ಬರುವುದಿಲ್ಲವೇ? 

ಈ ರೀತಿ ಇನ್ನುಳಿದ 250 ಪುಸ್ತಕಗಳನ್ನು ನಾನು ಕೆಲವು ಸಾಹಿತ್ಯ ಸಂಘ ಸಂಸ್ಥೆಗಳಿಗೆ ಕಾರ್ಯಕ್ರಮದಲ್ಲಿ ಹಂಚಲು ಉಚಿತವಾಗಿ ಪುಸ್ತಕವನ್ನು ಕೊಟ್ಟು, ಪರಿಚಿತರು ಮತ್ತು ಆತ್ಮೀಯರು ಹೀಗೆ ಎಲ್ಲರಿಗೂ ಪುಸ್ತಕ ಹಂಚಿ ನನ್ನ ಬಳಿ ಇನ್ನೊ ಐವತ್ತು ಪುಸ್ತಕ ಉಳಿಸಿಕೊಂಡಿದ್ದೇನೆ. 

ಪುಸ್ತಕ ಮಾರಾಟವೂ ಆಯಿತು. ನನ್ನ ಹೂಡಿಕೆಯೂ ವಾಪಸ್ ಬಂತು. ಪುಸ್ತಕ ಓದುಗರ ಮನೆ ಮನವನ್ನೂ ತಲುಪಿತು. ಇದೇ ನೀವು ಪ್ರಕಾಶಕರಿಗೆ ಕೊಟ್ಟು ಮಾಡಿಸಿದ್ದರೇ ಖಂಡಿತ ನಿಮಗೆ ಲಾಭವಲ್ಲ ನೀವು ಹೂಡಿದ ಬಂಡವಾಳವೂ ಸಿಗುವುದು ಕಷ್ಟ. ಹಾಗಾಗಿ ಹಲವಾರು ಕಡೆ ವಿಚಾರಿಸಿ ಪುಸ್ತಕ ಮುದ್ರಣಕ್ಕೆ ಕೈ ಹಾಕಿ. 

ಅದೆಷ್ಟೋ ಪ್ರಕಾಶಕರು ಮುಗ್ಧರಿಗೆ ಮೋಸ ಮಾಡುವುದುಂಟು. ನಾಲ್ಕಾರು ಕಡೆ ವಿಚಾರಿಸಿ ಕಷ್ಟವಾದರೂ ಸರಿ ನೀವೆ ಪುಸ್ತಕ ಹೊರತರಲು ಪ್ರಯತ್ನಿಸಿ. ಖಂಡಿತ ನಿಮಗೆ ಅದರಿಂದ ನಷ್ಟವಂತೂ ಆಗುವುದಿಲ್ಲ. ನಿಧಾನವಾದರೂ ಸರಿಯೇ ಲಾಭವೇ ಆಗುತ್ತದೆ. 

ಪುಸ್ತಕ ಹೊರತಂದರೆ ಸಾಲದು ಅದಕ್ಕೆ ಓದುಗರನ್ನು ಬಹುಮುಖ್ಯವಾಗಿ ಶೇಖರಿಸಬೇಕು. ನೀವೆ ಪುಸ್ತಕ ಹೊರತರುವುದರಿಂದ ನಿಮಗೆ ಲಾಭವೇ ಹೆಚ್ಚು. ಪ್ರಕಾಶಕರ ಮೂಲಕ ಹೋದರೇ ನಿಮಗೆ ಖಂಡಿತ ಪ್ರಯೋಜನಾವಾಗುವುದಿಲ್ಲ. 

ನಿಮ್ಮ ಪುಸ್ತಕ ಗೆಲ್ಲಬೇಕ? ಅದಕ್ಕೆ ಉತ್ತಮ ಬರಹ, ಸ್ವಲ್ಪ ಕಠಿಣ ಶ್ರಮ ಮತ್ತು ತಾಳ್ಮೆ ನಿಮ್ಮ ಜೊತೆಯಾಗಿಸಿಕೊಂಡು ಬಿಡಿ.

ಪುಸ್ತಕ ಮಾಡಿಸಲಾಗದೆ, ಸೋತು ಬೇಸರದಿಂದ ಕುಳಿತಿರುವ ಆಕಾಂಕ್ಷಿಗಳಿಗೆ ಇಲ್ಲೊಂದು ಅವಕಾಶವಿದೆ. ಓದಿಕೊಳ್ಳಿ..

http://avvapustakaalaya.blogspot.com/2021/01/blog-post_25.html

ಸೋನು ಸೌಮ್ಯ

ಕಾದಂಬರಿಗಾರ್ತಿ