ಪರಿಸರ - ಪರಿಸದ ದಿನದ ಅಂಗವಾಗಿ ಬರೆದ ಕವಿತೆ - ಪುನೀತ್ ಕುಮಾರ್

ಪರಿಸರ

ಹೂವು-ಬಳ್ಳಿ, ಗಿಡ-ಮರ
ಪ್ರಾಣಿ-ಪಕ್ಷಿ ಜಲಚರ
ಬೆಟ್ಟ-ಗುಡ್ಡ, ಬಾನು-ಬಯಲು
ಕೀಟ, ಕಾನು, ಸರೋವರ...
ಇವೇ ನಮ್ಮ ಪರಿಸರ
ಇವು ಸೃಷ್ಟಿಗಾನದಿಂಚರ

ಹಾಡು ನೀ ನಲಿದಾಡು ನೀ
ಪರಿಸರದ ಸಿರಿ ನೋಡು ನೀ

ಮೂಡಲು ನೇಸರ ಆ ನೀಲಿ ಬಾನಲ್ಲಿ
ಸವಿರಾಗ ಕೇಳು ನೀ ಕೋಗಿಲೆ ಹಾಡಲ್ಲಿ
ಸಮರಸ ಸಾರುವ ಆ ಜೇನಗೂಡು
ಸಾಲಾಗಿ ಹಾರುವ ಬೆಳ್ಳಕ್ಕಿ ನೋಡು

ಸುಗಂಧ ಬೀರುವ ನೂರಾರು ಮಂದಾರ
ಫಲಗಳ ನೀಡುವ ಮಣ್ಣೇ ಬಂಗಾರ
ಬೆಳ್ಳಿ ಬೆಳಕ ಚೆಲ್ಲುವ ಚಂದಿರ
ತಂಪನೀಯುವ ತರುಗಳು ಸುಂದರ

ಮಳೆಯ ತರುವ ಮೇಘಗಳ ಸಂಚಾರ
ಮಳೆಬಿಲ್ಲು- ಸೃಷ್ಟಿಯ ಸೊಂಪಾದ ಚಿತ್ತಾರ!
ತೊರೆಗಳ, ತೆರೆಗಳ ವಿವಿಧ ಝೇಂಕಾರ
ಮಿರಮಿರ ಮಿನಗುವ ಮುಕ್ಕೋಟಿ ತಾರಾ

ಕಡಲೊಡಲಲಿ ಅಲೆವ ವಿವಿಧ ಜಲಚರ
ಮುಗಿಲನ್ನೆ ಮುಟ್ಟಿಸಿ ಬೀಗುವ ಶಿಖರ
ಹೊಲದೊಳು ತೆನೆಹೊತ್ತು ಮಿರುಗುವ ಪೈರು
ನೆಲದೊಳಗೆ ಸಿಗುವುದು ಲೋಹದ ಅದಿರು

ಸೃಷ್ಟಿಸಿರಿಯ ಚರಾಚರ
ಸವಿವ ಮನಕೆ ಸಡಗರ!

ಗಾಳಿ ಬೆಳಕು ನೀರು ಮಣ್ಣು
ಇವೇ ನಮ್ಮ ಬಾಳ ಕಣ್ಣು
ಕಣ್ಣ ಕಳೆದುಕೊಂಡು ನೀನು
ಆಗಬೇಡ ಕುರುಡನು

ಇಂದು ನೆಟ್ಟ ಗಿಡ ಹಸಿರು
ನಾಳೆ ಅದೇ ನೆಳಲು, ಉಸಿರು
ಮರೆತು ನಡೆದೆಯೆಂದರಿದನು
ಆಗದೆಂದೂ ಬಾಳು ಹಸನು

ಸೃಷ್ಟಿ ಸಿರಿಯ ಚರಾಚರ
ನರಗೆ ಸಿಕ್ಕ ಮಹಾವರ
ಕಣ್ಣು ಬಿಟ್ಟು ಕಾಣ್ಬ ಮನಕೆ
ಪರಿಸರದೊಳು ಪ್ರತಿಸ್ವರದೊಳು
ಪ್ರತಿಮನದೊಳು ಕಣಕಣದೊಳು
ದೈವ ದೃಗ್ಗೋಚರ.
ದೈವ ದೃಗ್ಗೋಚ್ಚರ.

- ಪುನೀತ್ ಕುಮಾರ್ ವಿ